पुष १८ काँकरभिट्टा/मेची नेत्रालय काँकरभिट्टा गोल्ड कप दोस्रो संस्करण अन्र्तगत आज भएको तेस्रो दिनको खेलमा रुपन्देही ११ विजयी भएको छ ।
काँकरभिट्टा माविको खेल मैदानमा जारी प्रतियोगिता अन्र्तगत आज रुपन्देही ११ र बिआरसी क्लव भुटानबीचको खेलमा ३–१ गोल अन्तरले रुपन्देही विजयी बनेको हो ।
खेलको पहिलो हाफको दोस्रो मिनेटमै रुपन्देहीका जर्सी नम्बर ९ का खेलाडी दीपक राईले पहिलो गोल गर्दै टिमलाई अग्रता दिलाएका थिए ।
त्यस्तै खेलको दोस्रो हाफको ७१ औं मिनेटमा रुपन्देहीका दीपक राई पुनः अर्को गोल थपेर जित पक्का गरेका थिए ।
खेलको दोस्रो हाफको ८० औं मिनेटमा बिआरसी भुटानका जर्सी नम्बर ११ का रमेश केसीले सान्त्वना स्वरुप १ गोल फर्काउन सफल भए भने खेलको इन्ज्यूरी थ्रीमा रुपन्देहीका जर्सी नम्बर १९ का लक्ष्मण रुचालले बिआरसी भुटानविरुद्ध थप १ गोल गरेका थिए ।
सो खेलको म्यान अफ दी म्याच घोषित रुपन्देही ११ का दीपक राईलाई मेची नेत्रालयले सौजन्य गरेको ५ हजार रुपैयाँ नगदराशी पुरस्कार स्वरुप नेत्रालयका कार्यालय प्रमुख विकास घिमिरे र प्रतियोगिता आयोजक समितिका सल्लाहकार संयोजक गङ्गालाल गुरुङले संयुक्त रुपमा प्रदान गरेका थिए ।
भोली(मङ्गलबार)को खेल सिएमजी संकटा क्लव र सशस्त्र प्रहरीको एपिएफबीच हुने प्रतियोगिता आयोजक समितिका अध्यक्ष मीनबहादूर बस्नेतले जानकारी दिए ।
