भीमदत्तनगर, १८ पुस । राष्ट्रिय प्रजातन्त्र पार्टीका अध्यक्ष कमल थापाले यथास्थितिमा संविधान संशोधन विधेयक अघि बढाउन खोजे त्यो मुलुकका लागि प्रत्युत्पादक हुने बताउनुभएको छ ।
मिडिया नेपाल, कञ्चनपुरले आज आयोजना गरेको पत्रकार सम्मेललनमा बोल्दै अध्यक्ष थापाले राजनीतिक सहमति कायम गरेरमात्रै अघि बढ्न प्रमुख राजनीतिक दलहरुलाई आग्रहसमेत गर्नुभयो ।
राजनीतिक सहमति नभए मुठभेड निम्त्याउँने भन्दै उहाले मधेसी मोर्चाका जायज माग सम्बोधन गर्नुपर्नेमा जोड दिनुभयो ।
उहाँँले संविधान कार्यान्वयनमा राप्रपाको सकारात्मक र रचनात्मक भूमिका निभाउने बताउनुभयो । संसद् अवरोध अन्त्य हुनुपर्ने बताउँदै उहाँले तीनवटै तहको निर्वाचनमा सरकार र दलहरु लाग्नुपर्नेमा जोड दिनुभयो ।
त्यसैगरी पत्रकार सम्मेलनमा बोल्दै राप्रपाका राष्ट्रिय अध्यक्ष पशुपतिशम्शेर राणाले स्थानीय निकायको निर्वाचन नभए संविधानले पूर्णता नपाउने भन्दै सरकारको ध्यान निर्वाचनमा केन्द्रित हुनुपर्ने बताउनुभयो ।
