काठमाडौँ, १८ पुस ।
उपप्रधान तथा अर्थमन्त्री कृष्णबहादुर महराले ठूलो पुँजीले भन्दा स–सानो पुँजीको एकीकरणबाट दिगो विकास गर्न सहकारी मेरुदण्ड सावित हुने धारणा राख्नुभएको छ ।
राष्ट्रिय सहकारी सङ्घले आयोजना गरेको राष्ट्रिय कार्यशाला गोष्ठीलाई संबोधन गर्दै मन्त्री महराले सरकारी, सहकारी र निजी क्षेत्रको संयुक्त प्रयत्नबाट मुलुकको विकास गतिशील हुने बताउनुभयो ।
उहाँले नेपालको संविधानले सार्वजनिक, निजी र सहकारी क्षेत्रको सहभागिता र स्वतन्त्र विकासमार्फत राष्ट्रिय अर्थतन्त्र सुदृढ गर्ने परिकल्पना गरेको भन्दै त्यसलाक्ष्ई पुरा गर्न सबैको हातेमालो आवश्यक हुने बताउनु भयो ।
यस्तै रक्षामन्त्री बालकृष्ण खाँणले सहकारी अगुवासँग व्यवस्थापकीय क्षमता, लगनशीलता र अर्थको राम्रो समायोजन गर्न सक्ने सीप र दक्षता भएकाले उनीहरुलाई स्थानीय निकायको जिम्मेवारी दिदा राम्रो हुने धारणा राख्नुभयो ।
नेपाली राजनीतिमा शुद्धीकरणको अभियन्ता सहकारीकर्मीहरु भएको भन्दै उहाँले शान्ति, समृद्धि र गाउँको विकासका लागि संस्थाको अग्रणी भूमिका रहेको चर्चा गर्नुभयो ।
सहकारी सङ्घका अध्यक्ष केशव बडालले सहकारीमा सुशासन कायम गरी संयुक्त राष्ट्रसङ्घको दिगो विकास लक्ष्य प्राप्तिका लागि नेपालका सहकारीको भूमिका कस्तो रहनुपर्छ भन्ने बोध गराउने उद्देश्यले कार्यशाला आयोजना गरिएको बताउनुभयो ।
आर्थिक विकास र सामाजिक रुपान्तरणका लागि सहकारी’ भन्ने अभियानका साथ सुरु भएको उक्त कार्यशाला दुई दिनु सम्म सन्चालन हुनेछ । गोष्ठीमा मुलुकभरिका विभिन्न क्षेत्रका विषयगत सहकारी संस्थाका ३०० प्रतिनिधिको सहभागिता छ ।
