काठमाडौ १८ पौष ।
संसदमा प्रस्तुत हुने रणनिति तय गर्न प्रमुख प्रतिपक्षी नेकपा एमालेको संसदीय दलको बैठक आज बस्दैछ । मध्यान्न १२ बजे बस्ने बैठकमा संविधान संशोधन विधेयक सदनमा पेश हुन नदिन अपनाउन सकिने रणनितिबारे छलफल हुने जनाइएको छ ।
संशोधन विधेयक फिर्ता गर्नुपर्ने माग गर्दै सदनमा आन्दोलनरत विपक्षी मोर्चाको नेतृत्व गरेको एमालेले आजको बैठकमा प्रमुख दलहरुबीच पछिल्लो समय भएको वार्ताको समिक्षा गर्दै भावी रणनिति तय गर्ने जनाएको छ ।
एक महिना लामो सदन अवरोधका कारण महाअभियोग प्रस्ताव लगायत निर्वाचन सम्बन्धी विभिन्न विधेयकहरु समेत अलपत्र परेपछि एमालेले आजको बैठकबाट आन्दोलनका कार्यक्रममा केही लचकता अपाउने तयारी गरेको एमाले प्रमुख सचेतक भानुभक्त ढकालले जानकारी दिनुभयो ।
यद्यपी प्रमुख तीन दलका शिर्ष नेता सम्मिलित बैठकको निर्णयका आधारमा आगामी रणनिति तय गरिने ढकालले बताउनु भयो । एमाले सहितका ९ विपक्षी दलको हिजो भएको छलफलमा संविधान संशोधन विधेयकलाई असफल पार्ने सहमति बनेको थियो ।
