एजेन्सी, पुस १८ ।
इङ्लिश प्रिमियर लिग फुटबल अन्तर्गत गएराती भएका खेलहरुमा आर्सनल र टोटनह्याम हट्सपर विजयी भएका छन् ।
आफ्नै मैदानमा भएको खेलमा आर्सनलले क्रिष्टल प्यालेसलाई २–० ले हराएको हो । खेलमा आर्सनललाई विजयी गराउन ओलिभर जिरु र अलेक्स ईओबीले एक एक गोल गरे ।
जितसँगै आर्सनल अंक तालिकाको तेस्रो स्थानमा उक्लिएको छ । प्रिमियर लिग अन्तर्गत गएराती भएको अर्को खेलमा टोटनह्याम हट्सपरले वाट्फोर्डलाई ४–१ ले हराएको छ ।
खेलको पहिलो हाफमै चार गोल गरेको टोटनह्यामका लागि ह्यारी केन र डेले अलीले दुई दुई गोल गरेका थिए । दोस्रो हाफको ईन्जुरी समयमा वाट्फोर्डका योनुस काबुलले एक सान्तवना गोल फर्काएका हुन् ।
गएरातीका खेलहरुपछि प्रिमियर लिगको अंक तालिकामा ४९ अंक जोडेको चेल्सी शिर्ष स्थानमा छ । ४३ अंक जोडेको लिभरपुल दोस्रो स्थानमा रहँदा ४० अंकको साथ आर्सनल तेस्रो स्थानमा उक्लिएको छ ।
चौथो स्थानको टोटनह्याम हट्सपरको ३९ अंक छ भने समान ३९ अंक जोडेको म्यान्चेस्टर सिटी पाँचौ स्थानमा झरेको छ ।
