कपिलवस्तु, १७ पुस ।
लगातारको शीतलहर र चिसोका कारण कपिलवस्तुका सबै सामुदायिक विद्यालय १५ दिनका लागि बन्द गरिएको छ ।
विद्यालयमा आउने बिद्यार्थीलाई न्यानो कपडाको अभावमा चिसोले बिभिन्न समस्या आउन थालेपछि आजदेखि विद्यालय बन्द गरिएको जिल्ला शिक्षा कार्यालयले जनाएको छ ।
सो क्षेत्रका सामुदायीक बिद्यालयमा आउने बिद्याथीहरु विपन्न, दलित र सर्वसाधारणका बालबालिका अधिक सङ्ख्यामा रहेका छन् ।
विद्यालयको वार्षिक पात्रोअनुसार वर्षे बिदामा कट्टी हुने गरी १५ दिनका लागि विद्यालय बन्द गरिएको जिल्ला शिक्षा अधिकारी हरि गौतमले बताउनुभयो ।
केही दिनयता जिल्लामा दिनभर हुस्सु लाग्ने, शीत पर्ने र जाडो बढ्दै गएपछि सर्वसाधाणको जनजीवन पनि प्रभावित बनेको छ ।
जाडोका कारण सेवाग्राहीको सरकारी कार्यालयमा उपस्थिति न्यून देखिएको छ । त्यस्तै तौलिहवा अस्पतालमा निमोनिया श्वासप्रश्वासका समस्या देखिएका बालबालिका र वृद्धवृद्धाको चाप बढेको छ ।
