काठमाडौ १७ पौष ।
मुलुकको एकमात्र सरकारी दूरसन्चार सेवा नेपाल टेलिकमले आजदेखि फोर जी मोबाइल इन्टरनेट सेवा सुचारु गर्दैछ । विश्व बजारमा व्यावसायिक रुपमा यो सेवा सुरु भएको आठ वर्षपछि नेपालमा सन्चालनमा आउन लागेको हो ।
फोर जीको आज सफ्ट लन्च हुने नेपाल टेलिकमका प्रवन्ध निर्देशक कामिनी राजभण्डारीले जानकारी दिनुभयो । आज एक कार्यक्रमकाबीच सन्चारमन्त्री सुरेन्द्र पाण्डेले फोर जी सेवाको औपचारिक उद्घाटन गर्नुहुनेछ ।
टेलिकमले पहिलो चरणमा आजदेखि काठमाडौ उपत्यका र पोखरामा यो सेवा सुचारु गर्ने तयारी गरेको छ । त्यसपछि क्रमशः देशका प्रमुख शहरहरुमा पनि विस्तार गर्दै लैजाने टेलिकमले जनाएको छ ।
विश्व चर्चित दूरसन्चार कम्पनी टेलियासोनेराले सन् २००९ मा नर्वेको ओस्लोमा पहिलो पटक व्यवसायिक रुपमा फोर जी सेवा सुरु गरेको थियो ।
नेपालमा सुरु हुन लागेको फोर जी सेवा मोबाइल इन्टरनेटको न्यनुतम ३० मेगाविट्सको रहनेछ । यो सेवा सुरु भएपछि सेवाग्राहीले आफूले चाहे अनुसार नेटवर्क अपरेटर र फ्रिक्वेन्सी प्रयोग गरेर फोर जी र थ्री जी दुवै सेवा लिन सक्नेछन् ।
यो सेवा नेपाल टेकिलमले वितरण गरेका सिमित सिममा मात्र चल्नेछ भने आइफोन प्रयोगकर्ताले केही समय पछि मात्र फोर जी सेवा उपयोग गर्न पाने भएको छ ।
