काठमान्डौ पुस १७।
नेपाल विद्युत प्राधिकरणले गएराति देखि भारतबाट थप ४० मेगावट विद्युत नेपाल ल्याएको छ ।
हालै भएको उर्जा मन्त्रालयका सचिव अनुपकुमार उपाध्याय र प्राधिकरणका प्रमुख कार्यकारी निर्देशक कुलमान घिसिङ सहितको टोलीको भारत भ्रमणले थप ८० मेगावाट विद्युत खरिद गर्ने सम्झौता गरेको थियो ।
सोही सम्झौता अनुसार गएराति देखि पहिलो चरण अन्तर्गत ४० मेगावाट विद्युत भारतबाट नेपाल भित्रन थालेको हो । बाँकी ४० मेगावाट विद्युत भने आगामी माघ १७ गते देखि नेपाल भित्रने विद्युत प्राधिकरणले जनाएको छ ।
भारतको मुजफ्फरपुर देखि ढल्केबर सम्म अन्तर देशीय प्रसारण लाइनबाट नेपालमा गएराति देखि थप विजुली आयात भएको हो ।
यो सँगै छिमेकी मुलुक भारतबाट नेपालमा अव १ सय २० मेगावाट विद्युत आयात हुन थालेको छ । उर्जा मन्त्रालयले टनकपुरबाट समेत थप १५ मेगावाट विजुली आयात गर्ने विषयमा भारतसँग छलफल गरिरहेको जनाएको छ ।
मन्त्रालयको सन् २०१७ भित्र मुलुकभर लोडसेडिङ अन्त्य गर्ने अभियान अन्तर्गत नेपाल विद्युत प्राधिकरणले थप विद्युत आयात गरेको हो ।
