झापा, १७ पुस । झापाको काँकडभिट्टामा जारी काँकडभिट्टा गोल्डकप फुटबल प्रतियोगीताको दोश्रो संस्करण अन्तरगतको आजको खेलमा आयोजक काँकडभिट्टा गोल्डकप टिम र ब्लु आर्मी, सिलोङ, भारतबीच हुने छ ।
मेची नेत्रालय काँकडभिट्टाको आयोजनामा भएको खेल आज अपरान्ह ३ बजे हुनेछ ।
हिजो भएको उद्घाटन खेलमा रमपम झापा –११ सेमिफाइनलमा प्रवेश गरेको छ । काँकडभिट्टा माविको खेल मैदानमा आयोजित खेलमा हिमालयन शेर्पा काठमाडौँलाई ट्राइबेकरमा ५–३ को गोलअन्तरले हराउँदै झापा–११ ले सेमिफाइनलको यात्रा तय गरेको हो ।
निर्धारित समयमा २–२ को बराबरी भएपछि निर्णयका लागि खेलका रेफ्री लब खत्रीले खेललाई सोझै टाइब्रेकरमा लगेका थिए । झापाका तर्फबाट कप्तान योगेश गुरुङ, कर्ण लिम्बू, रवि थापा मगर, बुद्ध लिम्बू र रजनी धिमालले गोल गरेका थिए ।
हिमालयन शेर्पाका तर्फबाट भूपाल गुरुङ, हेमन गुरुङ र रुपेश केसीले गोल गरे । टिमका विदेशी खेलाडी मोसाले हानेको प्रहार गोलपोष्ट बाहिर गएपछि हिमालयन शेर्पाको खेल यात्रा टुङगिएको थियो ।
यही पुस २३ गतेसम्म चल्ने प्रतियोगिताका विजेता टिमले नगद रु चारलाख एकहजार राशीको पुरस्कार र उपविजेता टिमले नगद रु दुईलाख एकहजार पाउनेछन् ।
प्रतियोगितामा नेपालका ‘ए’ डिभिजनका आठ टिमको सहभागिता रहेको छ ।
