पुष १६ काठमाण्डौं । नेकपा ( माअोवादी ) , क्रान्तिकारी माओवादी र नेकपा मशालका नेताहरुले माथिल्लो कर्णाली , अरुण तेस्रो लगायतका राष्ट्रघाती सम्झौता खारेज गराएरै छाड्ने उदघोष गरेका छन् ।
तीनै पार्टीले वानेश्वरको अल्फाविटा कम्लेक्समा आयोजना गरेको जलस्रोतमाथिको हस्तक्षेप र स्वाधीनता विषयक अन्तरक्रिया कार्यक्रममा बोल्दै माओवादी महासचिव नेत्र विक्रम चन्दले भारतले काग्रेस , एमाले र माओवादीलाई मात्र नेपाल र नेपाली ठानेर ३ करोड जनताको भावना विपरीत हस्तक्षेप गरीरहेको भन्दै यसको प्रतिवाद गर्ने बताउनु भयो ।
उहाले नेपाललाई भारतले यहाका दलालहरुमार्फत फसाउने गरेको भन्दै देशलाई र जनतालाई धोका दिने दलालहरुलाई पनि नछाड्ने बताउनु भयो । ३ करोड नेपाली जनताको भावना अनुसार काम गर्न उहाले भारतलाई आग्रह गर्नु भयो । कार्यक्रममा क्रान्तिकारी माओवादीका अध्यक्ष मोहन बैद्यले नेपालमा जलस्रोतमाथि राष्ट्रहित विपरीतका विदेशी लगानी खारेज गर्नु पर्ने बताउनु भयो । उहाले भारतीय विस्तारबाद र नेपालको दलाल सामन्ति सत्ताले नेपाली जनतामाथि चरम शोषण र लुट मच्चाईरहेको भन्दै यो सत्ता ढाल्नु पर्ने बताउनु भयो । दलाल सत्ता ढले पछि मात्रै देशमा विकास हुने बैद्यको तर्क थियो ।
यसै गरी जनमोर्चाका सचिव हेमलाल पुरीले जल , जमिन र जंगल भारतलाई बुझाएर देशघात गरेको भन्दै ठूला दलका नेताहरुको आलोचना गर्नु भयो । यस्तै जलस्रोतविद दिपक ज्ञवालीले भारतलाई नेपालको बिजुली भन्दा पनि पानी चाहिएको दावी गर्दै खानेपानी र जलस्रोतको अभाव रहेकाले भारत पानी कब्जा गर्न लागि परेको बताउनु भयो ।
कुनै पनि भारतसगँको जल सम्झौताले नेपालको हित नगरेको भन्दै उहाले स्वदेशका लागि चाहिने बिजुली उत्पादन गरीसके पछि आवस्यक पर्ने बिजुली पानी बेच्न सकिने भन्दै नेताहरुको कमजोरीका कारण देशमा समस्या परेको उल्लेख गर्नु भयो । जलस्रोत क्षेत्रका जानकारी रत्न संसार श्रेष्ठले भारतले नेपालमा हस्तक्षेप गरेको भन्दा पनि नेपाली नेताहरुले भारतलाई हस्तक्षेपका लागि निम्त्याएको बताउनु भयो । जलस्रोत क्षेत्रमा अध्ययन गरीरहेका रतन भण्डारीले भारतले सुगौली सन्धि देखि नै भारतले नेपालको जलस्रोतमा कब्जा गर्न थालेको बताउनु भयो ।
