चितवन, १६ पुस । परराष्ट्रमन्त्री डा प्रकाशशरण महतले मुलुकको विकासका लागी आर्थिक बहस हुन जरुरी रहेकोमा जोड दिनुभएको छ ।
प्रजातान्त्रिक विचार समाजद्धारा ४१ औंँ राष्ट्रिय मेलमिलाप दिवसको अवसरमा आज चितवनमा आयोजित कार्यक्रममा बोल्दै मन्त्री महतले राजनीतिक भन्दा अवको समय विकासका बिषयमा बहस हुन जरुरी रहेको बताउनु भयो ।
विधिको शासनमार्फत समाज परिवर्तन आजको आवश्यकता रहेको भन्दै उहाले आर्थिक रुपमा कमजोर मुलुक भएकाले विदेशीको हस्तक्षेप भोग्नु परेको बताउनु भयो ।
विदेशीको चासो र चिन्तालाई एकैपटकमा हटाउन नसकिने भन्दै मन्त्री महतले आर्थिक विकाससँगै बिदेशीको हस्तक्षेप र प्रभाव हटेर जाने तर्क गर्नुभयो । पछिल्लो समय राष्ट्रियतालाई गलत ठाउँबाट उठान गरिएकाले राष्ट्रियतामाथि आघात पुग्न जाने उहाँको भनाइ थियो ।
यस्तै उहाले राष्ट्रियता मजवुद बनाउनका लागि बीपीको मेलमिलापको सिद्धान्त अहिलेको सन्दर्भमा महत्वपूर्ण रहेकोमा जोड दिनुभएको छ ।
मन्त्री महतले बीपीको मेलमिलाप नीतिमा सबैको विचार एक हुनुपर्छ भन्ने होइन, एउटै विधिबाट देश चल्नुपर्छ भन्ने सन्देश रहेको बताउनुभयो ।
कार्यक्रममा नेपाल महिला सङ्घकी केन्द्रीय अध्यक्ष उमा रेग्मीले विपीको मेलमिलाप दिवस केवल देखावटी रुपमा मात्रै मनाउँदै आइएको बताउँदै यसलाई व्यवहारमा उतार्नुपर्ने धारणा राख्नु भयो ।
बीपीको मेलमिलाप नीतिले राष्ट्रियता मजवुद बनाउने बताउँदै उहाँले अहिलेको राजनीतिक सन्दर्भमा बीपीको मेलमिलाप नीतिको आवश्यकता अझ बढीरहेको बताउनु भयो ।
