काठमाडौं, पुस १४।
काठमाडौं उपत्यकासहित तराईमा अहिले बाक्लो हुस्सु लागेको छ । अहिले लागेको बाक्लो हुस्सु घाम लागेपछि विस्तारै हट्ने मौसमविद् राजु प्रधानाङ्गले बताउनुभयो ।
हुस्सुका कारण अहिले काठमाडौंको भिजिबिलिटि २०० मिटरमा झरेको छ । मौसम विद् प्रधानाङ्गका अनुसार काठमाडौंमा लागेको हुस्सु अबको दुई तीन घण्टापछि हट्नेछ ।
तराईमा भने दिउँसोपछि मात्र हट्ने उहाँले जानकारी दिनु भयो । दिउँसो पहाडी क्षेत्रको मौसम बदली हुने उहाँले जानकारी दिनुभयो । तर पानी पर्ने संभावना भने छैन ।
यसैबिच बाक्लो हुस्सु लागेर भिजिविलिटी कम भएपछि त्रिभुवन विमानस्थलबाट हुने सबै उडान बन्द भएका छन् । विमानस्थलका अनुसार सामान्य अवस्थामा यतिबेला आन्तरिक उडान हुने गरेको थियो ।
बिहान ८ बजेपछि बाह्य उडान हुने गरेकामा हुस्सु नहटेसम्म आन्तरिक र बाह्य सबै उडान बन्द भएको विमानस्थल कार्यालयले जनाएको छ ।
अन्तराष्ट्रिय उडानको लागि कम्तिमा पनि ३ हजार मिटर भिजिविलिटि आवश्यक पर्ने मौसमविदले बताएका छन् ।
