काठमाडौ १३ पौष ।
इंग्लिस प्रिमियर लिग अन्तरगत पछिल्लो खेलमा स्टोक सिटीलाई पराजित गर्दै लिभरपुल अंक तालिकाको दोस्रो स्थानमा उक्लिएको छ ।
गएराति सम्पन्न खेलमा स्टोक सिटीलाई ४–१ गोल अन्तरले पराजित गरेको लिभरपुल दोस्रो स्थानमा उक्लिदै म्यानचेष्टर सिटीलाई पछि पारेको हो ।
लिभरपुलका लागि एडम लालना, रोबर्टो फिरमिनो र ड्यानिएल स्टरेजले गोल गरे । स्टोक सिटीका जानेली इम्बुलाले आत्मघाती गोल गरे । स्टोक सिटीका लागि जोन वाल्टर्सले एक गोल गरे ।
वाल्टर्सले १२ औं मिनेटमा गोल गर्दै स्टोकलाई सुरुवाति अग्रता दिलाएका थिए । ३४ औं मिनेटमा लालनाले लिभरपुलका लागि बराबरी गोल फर्काए । ४४ औं मिनेटमा फिरमिनोले गोल गरेपछि पहिलो हाफमा लिभरपुलले २–१ को अग्रता लियो ।
५९ औं मिनेटमा स्टोक सिटीका इम्बुलाले आत्मघाती गोल गरे । यस्तै ७० औं मिनेटमा स्टरेजले गोल गरेपछि लिभपरपुल ४–१ ले विजयी भयो । जितपछि लिभरपुलको १८ खेलबाट ४० अंक भएको छ ।
लिभरपुल शीर्ष स्थानको चेल्सीका भन्दा ६ अंकले पछि छ । यस्तै तेस्रो स्थानमा झरेको म्यानचेस्टर सिटीसँग लिभरपुलले एक अंकको अग्रता लिएको छ । १८ खेलबाट २१ अंकसहित स्टोक सिटी १३ औं स्थानमा छ ।
