काठमाडौं, पुस ११ ।
राष्ट्रिय खेलकुद प्रतियोगितामा लगातार तीन स्वर्णपदक जित्दै सशस्त्र प्रहरीका मुकुन्द्र महर्जनले ह्याट्रिक गरेका छन्
विराटनगरस्थित सहिद रंगशालामा भएको सातौं राष्ट्रिय खेलकुदमा पुरुष कराँतेतर्फ ६७ केजी तौलमा स्वर्ण हात जित्दै ह्याट्रिक पुरा गरे । मुकुन्द्रले पाँचौ र छैटौंमा पनि स्वर्णपदक जित्न सफल भएका थिए ।
सुदूरपश्चिमका मो.शेखु आलमले रजत तथा नेपाल प्रहरीका भुपेन्द्र खड्का र मध्यमाञ्चलका विशाल पौडेलले कास्यपदक पाएका छन् ।
यस्तै, पुरुषको ८४ केजीमुनिको तौलमा नेपाल प्रहरीका दिवस श्रेष्ठले पश्चिमाञ्चलका सुनित घर्तीमगरलाई पराजित गर्दै स्वर्णपदक जिते । तेस्रो स्थानमा पूर्वाञ्चलका ईश्वर माझी र सशस्त्रका भीमबहादुर तामाङ रहे ।
महिला ६८ केजी तौलमा सशस्त्र प्रहरीकी कल्पना बस्नेतले आर्मीकी रिता कार्कीलाई फाइनलमा पराजित गर्दै स्वर्ण हात पारिन् ।
मध्यमाञ्चलकी रोजिता रन्जित र पुलिसकी मनिता मोक्तानले कास्यपदक पाए ।
उता , विराटनगरमा भएको टेबलटेनिसतर्फको मिक्स डबलल्सको खेलमा नेपाल पुलिसका दीप साउन र नविता श्रेष्ठको जोडीले स्वर्णपदक कब्जा गरे ।
आफ्नै टोलीका स्यान्टु श्रेष्ठ र एलिना महर्जनको जोडीलाई ११–८, ११–५ र ११–४ले पराजित गर्दै उनीहरुले स्वर्ण जितेका हुन् ।
सशस्त्र प्रहरीका पुरुषोत्तम बज्राचार्य र सोनु थापामगर तथा आर्मीका कृष्ण थापामगर र रोविना महर्जनको जोडीले कास्यमा चित्त बुझाए ।
