काठमाडौ ,११ पुस ।
सत्तारुढ दल नेपाली कांग्रेसले तत्काल स्थानीय निकाय चुनावको मिति घोषणा गर्न सरकार सँग माग गरेको छ ।
सिंहदरबारस्थित पार्टी संसदीय दलको कार्यलयमा आज बसेको कांग्रेस पदाधिकारी, पूर्वपदाधिकारी तथा केन्द्रीय सदस्यहरुको बैठकले यस्तो माग गरेको हो ।
कांग्रेसको आजको बैठकले पुरानै संरचनामा स्थानीय निकायको चुनाव गराउन सरकारको ध्यानाकर्षण गराएको हो । स्थानीय निकायमा विनियोजित बजेट सदूपयोग गर्न तत्कालै चुनावको तयारी गर्नुपर्ने कंग्रेसले निर्णय गरेको छ ।
यस्तै बैठकले एमालेलाई पनि वार्तामार्फत संसद अबरोध हटाउन दबाब दिने निर्णय गरेको छ । बैठकले निर्वाचन आयोगको रिक्त पदाधिकारी पूर्तिका लागि पहल गर्ने, निर्वाचनसँग सम्बन्धित विधेयक अगाडि बढाउन आग्रह गर्ने निर्णय गरेको छ ।
बैठकपछि जानकारी दिदै कांग्रेस नेता रामचन्द्र पौडेलले पुनर्संरचना आयोगको प्रतिवेदन अनुसार स्थानीय तह स्थापित गर्न समय लाग्ने बताउदै संक्रमणकालीन व्यवस्था अनुसार स्थानीय चुनाव गर्न सम्भव भएको उल्लेख गर्नु भयो ।
कांग्रेसले सभामुखले संसद बैठक निरन्तर नबोलाएकोमा असन्तुष्टि जनाएको छ । कांग्रेसको हिजोको बैठकले पनि दलीय सहमति जुटाएर स्थानीय चुनावको मिति घोषणा गर्न सरकारसँग माग गरेको थियो ।
