काठमाडौं, १० पुस ।
पछिल्लो समय मुलकुमा उत्पन्न राजनीतिक गतिरोध गर्ने पहलमा जुटेको सत्ता साझेदार दल नेपाली कांग्रेसले संविधानप्रति असन्तुष्ट सबै पक्षलाई समेटेर संविधान कार्यन्वयनमा लाग्नुपर्ने निष्कर्ष निकालेको छ ।
सिंहदरबारस्थित कांग्रेस संसदीय दलको कार्यलयमा आज बिहान बसेको कांग्रेसको वर्तमान र पूर्वपदाधिकारी सम्मिलित संयुक्त बैठकले प्रतिपक्षी एमालेसहित मधेशी मोर्चालाई समेत मान्य हुने गरी संविधानको सर्वस्वीर्यता बढाउनुपर्ने निष्कर्ष निकालेको हो ।
थप छलफलका लागि भोली बिहान ८ बजे पुनः बैठक बस्ने सहमति पनि भएको कांग्रेसका पूर्वमहामन्त्री प्रकाशमान सिंहले जानकारी दिनुभयो । बैठकमा संशोधन प्रस्तावमा सहमतिका लागि कांग्रेसको अडान र लचकता तथा पार्टीकै नेता कार्यकर्ताले गरेको प्रस्तावको विरोध लगायतका विषयमा छलफल भएको थियो ।
संविधान संशोधन, स्थानीय तहको निर्वाचनका साथै समसामायिक राजनितिक विषयमा छलफल गर्न कांग्रेसले वर्तमान र पूर्वपदाधिकारीको बैठक बोलाएको हो । संसदको सबैभन्दा ठूलो दल भएपनि विद्यामान गतिरोध अन्त्यका लागि नेतृत्वदायी भूमिका खेल्न नसकेको भन्दै सत्ता साझेदार कांग्रेसको आलोचना हुदै आएको छ ।
