बागलुङ, पुस ९ ।
पूर्व प्रधानमन्त्री एवम् नेकपा एमालेका अध्यक्ष केपी शर्मा ओलीले सरकारले मंसिर १४ मा सदनमा दर्ता गराएको संविधान संशोधन प्रस्ताव कुनै हालतमा पारित नहुने दावी गर्नुभएको छ ।
नेकपा एमाले बागलुङको आठौँ जिल्ला अधिवेशन उद्घाटन गर्दै उहाले राष्ट्रियतामाथि गम्भीर आघात पुग्ने गरी संशोधन पेश भएकाले त्यस्तो प्रस्तावको कुनै औचित्य नभएको बताउनु भयो ।
उहाले संसदमा पेश भएको संविधान संशोधनको प्रस्ताव माथि छलफल समेत हुन नदिने चेतावनी दिदै यस्तो गम्भीर बिषयमा एमाले कसैले उचालेर नउचालिने भन्दै संशोधन प्रस्तावमा छलफल हुने र पारित हुने भ्रममा नरहन नेता कार्यकताहरुलाई आग्रहसमेत गर्नुभयो ।
संविधानको धारा २७४ ले निषेध गरेर प्रादेशिक सभा गठन र सिमांकन नगरी संविधान संशोधन गर्न खोजीएको भन्दै ओलीले चुनाव तर्फ लाग्न सरकारलाई सुझाव दिनुभयो ।
आजदेखि सुरु भएको एमाले जिल्ला अधिवेशनमा नयाँ नेतृत्वका लागि वर्तमान एमाले उपाध्यक्ष तथा सांसद दरबहादुर थापा, प्रदेश कमिटी सदस्य इन्द्रलाल सापकोटा र केन्द्रिय उर्जा बिभागका सदस्य हिराबहादुर केसी चुनावी मैदानमा उत्रिएका छन् । अधिवेशन सोमबारसम्म चल्ने छ ।
