भक्तपुर, पुस ७ ।
विप्लव माओवादी निकट युवा तथा विद्यार्थी संगठनले गरेको उपत्यका बन्दका क्रममा प्रहरीले भक्तपुर र काठमाण्डौबाट २८ जनालाई नियन्त्रणमा लिएको छ ।
बन्द गराउँदै हिँडेको आरोपमा प्रहरीले भक्तपुरबाट चारजना र काठमाण्डौबाट २४ जनालाई पक्राउ गरेको हो ।
भत्तपुर सूर्य्विनायक नगरपालिकास्थित दोलखाली खाजाघरबाट माओवादी मजदुर सङ्गठनका केन्द्रीय सदस्य युवराज आचार्य, क्रान्तिकारी मजदुर सङ्गठनका जिल्ला अध्यक्ष विक्रम आचार्य, भक्तपुर जिल्ला अध्यक्ष कुशल बोगटी र अखिल क्रान्तिकारीको भक्तपुर जिल्ला सचिव चित्रकमल ओलीलाई पक्राउ गरेको प्रहरी नायब उपरीक्षक कृष्ण प्रसाईंले जानकारी दिनुभयो ।
यता काठमाण्डौको कमलादीबाट दिउसो प्रकाश चन्द ,गणेश रैकाल ,सुनिता बम लगायत १० जना र रत्नपार्कबाट अखिल क्रान्तिकारीका केन्द्रिय सचिव रामबाबु विक, उपत्यका संयोजक लोकेश विक, केन्द्रिय सदस्य केशव सन्जेल, कृष्ण सेवा र प्रज्वल शाही लगायतका २४ जना पक्राउ परेका छन् ।
त्यसैगरी मध्यपुरथिमि नगरपालिका १३ राधेराधेस्थित मध्य उपत्यकाको बा३ख २४६५ नम्बरको बसमा बन्दकर्ताले तोडफोड गरेका छन् । सो क्रममा दुईजना यात्रु सामान्य घाईते भएको र उपचार पस्चात हाल फर्किएको भत्तपुर प्रहरीले जनाएको छ ।
बन्दकर्ताले सोही स्थानमा बा ७ च २१५० नम्बरको कारमा आक्रमण गरी सिसा फोडेका थिए ।
