काठमाडौं, पुस ६ ।
पूर्वाञ्चलमा आगामि पुस ८ गतेबाट सुरु हुने सातौं राष्ट्रिय खेलकुद प्रतियोगितामा सहभागी हुन खेलाडी, खेल पदाधिकारी तथा प्रशिक्षक जाने क्रम सुरु भएको छ ।
विराटनगर स्थित शहिद रंगशालामा शुक्रबार भव्य समारोहकाबीच प्रतियोगिताका उद्घाटन हुनेछ । प्रतियोगिता उद्घाटनस्थल विराटनगर, समापनस्थल धरानसँगै अन्य शहरहरु ईटहरी, ईनरुवा, दमकलगायतका ठाउँमा प्रतियोगिताको तयारी सम्पन्न भईसकेको छ ।
प्रदर्शनी खेलसहित कुल ३५ खेल समावेश हुने प्रतियोगितामा २९ सय ७१ खेलाडीले एक हजार ३५ पदकका लागि प्रतिस्पर्धा गर्नेछन् ।
यसपटक रग्वी, डान्स स्पोर्ट्स, साम्वो, रक क्लाइम्विङ र दोहोरीलाई प्रदर्शनी खेलको रुपमा समावेश गरिएको छ । यस्तै गल्फ, आर्चरी, फेन्सिङ र स्नुकरका विजेताले पदक प्राप्त गर्ने छैनन् ।
खेलाडीहरुले २ सय ९४ स्वर्ण र समान २ सय ९४ रजत तथा ४ सय ४७ कास्य पदकको लागि एक आपसमा प्रतिस्पर्धा गर्नेछन् ।
प्रतियोगितामा आर्मी, पुलिस र सशस्त्रका तीन विभागीय टोली र पाँच विकास क्षेत्रले सहभागिता जनाउने छन् ।
सातौ राष्ट्रिय खेलकुदका सबैभन्दा बढी सुनसरीमा ११ खेल हुनेछन् भने मोरङमा १०, झापामा पाँच, सिरहा, धनकुटा, ललितपुर र कास्कीमा एक–एक खेल हुनेछ ।
प्रतियोगिताको लागि राष्ट्रिय खेलकुद परिषदले ११ करोडको बजेट माग गरे पनि अर्थ मन्त्रालयले भने ८ करोड मात्रै निकासा दिएको छ ।
