काठमाडौं पुस ६ ।
भरतपुर क्यान्सर अस्पतालमा चरम आर्थिक अनियमितता भएको पाइएको छ । अस्पतालमा उपकरण खरिद, व्यवस्थापन लगायत विषयमा ठूलो आर्थिक अनियमितता भएको सरकारी छानबिन टोलीले देखाएको हो ।
व्यवस्थापकीय हिसाबले अस्पताल अधाोगतिमा लागेको उजुरी र गुनासोपछि स्वास्थ्य मन्त्रालयले बनाएको उच्चस्तरीय छानबिन टोलीले अनियमितता भएको ठहर गरेको हो ।
स्वास्थ्यमन्त्री गगन कुमार थापाले टोलीको प्रतिवेदन आउने वित्तिकै अस्पतालका अध्यक्ष र कार्यकारी निर्देशकसँग स्पष्टीकरण माग गर्नु भएको थियो ।
छानबिनका क्रममा टोलीले आर्थिक रुपमा वाषिर्क बजेटभन्दा बढी र स्रोत नै सुनिश्चित नभई २६ करोडौं रुपैयाँभन्दा बढी खर्च भएको देखिएको तर करोडौं मूल्यका उपकरण खरिद प्रक्रियामा आपसी विवादका कारण अड्किएको जनाएको छ ।
समितिले चीन सरकारले सहयोगस्वरुप दिएको २७ करोडबराबरको उपकरण प्राप्त भएपछि हालसम्म त्यसको प्याकसमेत नखोली जडानमा चासै नदिएको समेत औंल्याएको छ।
छानबिन क्रममा खरिद भइसकेका उपकरण जडानका लागि ठाउँ उपलब्ध गराउन कार्यकारी निर्देशकसँग पत्राचार गरे पनि काम नभएको टोलीले भेटेको छ । टोलीले एक महिनाभित्रै यस्तो उपकरण जडान नगरे कार्यकारी निर्देशकलाई निलम्बन गर्न सुझावसमेत दिएको छ।
