काठमान्डौ, पुस ५।
सरकारले गृह श्रमिकका समस्या समाधान गर्न ध्यान नदिएको आरोप सरोकारवालाहरुले लगाएका छन् । आज राजधानीमा भएको गृह श्रमिकहरुको सम्मेलनमा सरोकारवालाहरुले यस्तो आरोप लगाएका हुन् ।
गृह श्रमिकको पहिचान, अधिकार, सामाजिक सुरक्षा र जीविकोपार्जनका क्षेत्रमा भएको समस्या समाधान गर्न सरकार उदासिन देखिएको उनीहरुको आरोप छ ।
उनीहरुले नेपालमा करिब २२ लाख गृह श्रमिकको अवस्था नाजुक रहेको बताएका छन् । त्यसमा पनि भूकम्प प्रभावित क्षेत्रका गृह श्रमिकको अवस्था झनै दयनीय रहेको उनीहरुको भनाइ थियो ।
गृह श्रमिकले उत्पादन गर्ने सामग्रिको कच्चा पदार्थ र बजारीकरणमा समस्या भएको भन्दै उनीहरुले उचित मूल्यमा कच्चा पदार्थ उपलब्ध गराउन सरकारको ध्यानाकर्षण गराएका छन् ।
होमनेट नेपालका कार्यकारी निर्देशक ओम थपलियाले गृह श्रमिकको सामाजिक संरक्षणमा ध्यान दिन सरकारसँग आग्रह गर्नु भएको छ ।
