काठमान्डौ पुस ५ ।
युवा संघ रुपन्देहीका अध्यक्ष दुर्गा तिवारीको हत्याको विरोधमा आज रुपन्देहीमा बन्द गरिएको छ । घटनाको सत्यतथ्य छानवीन, हत्यामा संलग्नलाई तत्काल कारवाही गर्न माग गर्दै युवा संघले रुपन्देही बन्दको आह्वान गरेको हो ।
रुपन्देही सहित लुम्बिनी अञ्चलका ६ जिल्लामा आज एक दिनका लागि बन्द आह्वान गरिएको युवा संघले जनाएको छ । बन्दका कारण बुटवल र भैरहवामा सवारी साधन सञ्चालनमा आउन सकेको छैन । पठनपाठन पनि ठप्प रहेका छन् ।
देवदह नगरपालिका ढेकावार कोलीयामा मोटरसाईकलमा आएका दुई अज्ञात ब्यक्तिको गोली प्रहारबाट गम्भीर घाईते भएका तिवारीको उपचारका क्रममा हिजो अपरान्ह निधन भएको थियो ।
हत्याको विरोध गर्दै हिजै साँझबाट आन्दोलनमा उत्रिएका एमाले कार्यकर्ताले आज बिहानैदेखि बुटवल क्षेत्रमा प्रदर्शन थालेका छन् ।
प्रारम्भिक अनुसन्धानमा देवदहका मनोज पुन नेतृत्वको समुहले तिवारीमाथि गोली हानेको देखिएको प्रहरीले दावी गरेपनि युवा संघले भने राजनीतिक प्रतिशोधका कारण हत्या भएको दावी गर्दै आएको छ ।
