काठमाडौं, पुस २ ।
पाँच नम्बर प्रदेश विभाजन गर्ने गरी आएको संबिधान संसोधन प्रस्तावको बिरोधमा आज पनि पश्चिमका बिभिन्न जिल्लामा बन्द तथा प्रदर्शन जारी छ ।
बाँके, बर्दिया, कपिलवस्तु, रुपन्देही, नवलपरासी, अर्घाखाँची, पाल्पा, गुल्मी, रोल्पा, रुकुम, प्युठान, दाङलगायतका जिल्लामा आन्दोलनकारीले आज पनि बिहानैदेखि प्रदर्शन गरिरहेका छन् ।
विभिन्न राजनीतिक दल, नागरिक समाज, उद्योग वाणिज्य संघलगायतको संयुक्त संघर्ष समितिले दोस्रो दिन पनि १२ वटा जिल्ला बन्दको आह्वान गरेको हो ।
बन्दका कारण जिल्लामा यातायात, पसल, शैक्षिक संघसंस्था सञ्चालन भएका छैनन् । पूर्व–पश्चिम राजमार्ग तथा सिद्धार्थ राजमार्गमा पनि अत्यावश्यक बाहेकका सवारी साधन सञ्चालन हुन सकेका छैनन् ।
प्रदर्शनकारीले जिल्लामा सदरमुकाम केन्द्रित भएर आन्दोलन चर्काएका छन् । सरकारले प्रदेश नं. ५ को पहाड र तराईलाई अलग–अलग बनाउने गरी संविधान संसोधनको प्रस्ताव संसदमा दर्ता गराएको विरोधमा प्रदेशका सबैजसो जिल्लामा प्रदर्शन भइरहेको हो ।
यता, गुल्मीमा पनि १८ दिनदेखि अनिश्चिकालिन आम हड्ताल जारी छ । बन्दले जनजीवन कष्टकर बन्दै गएको छ ।
लामो बन्दको कारण जिल्लामा सर्वसाधारणको जनजीवन निकै कठिन बनेको छ । सबै बजार, उद्योग तथा कलकारखाना, यातायात सेवा ठप्प हुँदा सर्वसाधारणलाई सास्ती भएको छ ।
