काठमान्डौ पुस १ ।
महानगरीय ट्राफिक प्रहरी महाशाखाले आज देखि ट्राफिक व्यवस्थापनमा थप कडाइ गर्ने भएको छ । आजदेखि मालबाहक सवारी साधन बिहान ९ देखि ११ तथा साँझ ४ देखि ६ बजेसम्म चक्रपथभित्र प्रवेश गर्न नपाउने महाशाखाले जनाएको छ ।
तर महाशाखाले पानी तथा इन्धन बोक्ने सवारी साधनलाई भने कुनै रोक तोक नभएको बताएको छ । पिक आवरमा देखिएको अत्याधिक सवारी चापलाई व्यवस्थापन गर्न ट्राफिकले यो प्रावधान लागू गर्न लागेको हो ।
यस्तै माइक्रोबसले सिट क्षमता भन्दा बढी यात्रु राख्न नपाउने, अनावश्यक सिट जोड्न नपाउने लामो दूरीका बसहरु बसपार्कबाटै छुट्नुपर्ने प्रावधान बनाइएको छ ।
यातायात व्यवस्था विभागको गत मंसिर २ गते भएको निर्णय अनुसार सरोकारवालासँगको छलफल पछि आजदेखि नियम कडाइका साथ लागू गर्न लागिएको हो ।
यातायात व्यवस्था विभागले उपत्यकाका बिद्यालय बसहरुलाई बिहान ९ बजेसम्म बिद्यालय पुगिसक्नुपर्ने र अपरान्ह चार बजे बिद्यार्थी छाडेर गन्तव्यमा पुगिसक्नुपर्ने निर्णय गरेको थियो ।
