काठमाडौं,२९ मंसिर ।
२०५९ सालका एसएलसीको बोर्ड टपर डा. विशाल ज्ञवाली द ब्रिटिश मेडिकल जर्नल (बीएमजे)को सल्लाहकारमा नियुक्त भएका छन् ।
हाल जापानमा क्यान्सर उपचारको विशेषज्ञ तालिम लिइरहेका ज्ञवाली विश्व प्रसिद्ध मेडिकल जर्नलको सल्लाहकारमा नियुक्त भएका हुन् ।
विश्वकै पुरानो उक्त जर्नलको सल्लाहाकारमा नियुक्ती हुने उनी पहिलो नेपाली हुन् । बीएमजेले नियुक्त गरेका पाँच जना मध्ये उनी पनि परेका हुन् । पाँचमध्ये उनी एसियाबाट नै प्रतिनिधि गर्नेमध्ये एक हुन् । बीएमजेले उनीसहित अमेरिकाका दुई र अन्य दुई जना विभिन्न जर्नलमा सम्पादक भैसकेका व्यक्तिलाई नियुक्त गरेको छ ।
सल्लाहाकारका रुपमा नियुक्त भएका डा. ज्ञवाली सबैभन्दा कान्छा सल्लाहाकार पनि हुन् । डा. ज्ञवाली हाल जापानको नागोया विश्वविद्यालयमा क्यान्सर उपचारको विशेषज्ञ तालिम तथा मेडिकल अंकोलोजिमा पिएचडी गरिरहेका छन् । पाँच वर्षे अध्ययन कोर्षका लागि जापान पुगेका डा. ज्ञवालीको अब एक वर्ष अध्ययन समय बाँकी छ । अध्ययन सकेपछि उनी नेपाल फर्केर सेवा गर्ने बताउँछन् ।
बीएमजेको सल्लाहाकारमा नियुक्ती पाउनु आफ्ना लागि ठुलो जिम्मेवारी भएको भन्दै उनले पूूर्ण रुपमा पुरा गर्दै नेपालको नामलाई चिनाउने बताएका छन् ।
