काठमाडौ २८ मंसिर ।
उर्जामन्त्री जनार्दन शर्माले देशलाई अँध्यारो मुक्त बनाउने अभियानमा बाधा पु¥याउने जोसुकैलाई कारवाही गरिने बताउनु भएको छ ।
प्रेस सेन्टर मोरङले आज विराटनगरमा आयोजना गरेको पत्रकार सम्मेलनमा बोल्दै उहाँले देश लोडसेडिङ मुक्त बनाउने अभियानमा सरकार लागि परेको बताउनुभयो ।
यसमा बाधा सिर्जना गर्न केही व्यक्ति सक्रिय भएर लागेको उहाँले आरोप लगाउनुभयो । उर्जा मन्त्री शर्माले विद्युत चोरी नियन्त्रणमा पनि लागि परेको बताउनुभयो ।
पूर्वाञ्चलको विद्युतीय क्षेत्रको अनुगमनको क्रममा विराटनगरमा आइपुग्नुभएका मन्त्री शर्माले थप विद्युत उत्पादन गर्ने योजना अनुरुप सरकारले काम अगाडि बढाई रहेको स्पष्ट पार्नु भयो ।
नेपाललाई अझै थप १० हजार मेगावट विद्युत आवाश्यक रहेको मन्त्री शर्माको भनाई छ । उहाँले सुकुम्बासीका लागि एक हजार रुपैयाँ प्राधिकरणमा धरौटी राखेर मिटर लिन सक्ने व्यवस्था गरेको समेत जानकारी दिनुभयो ।
