काठमाडौं,२८ मंसिर ।
उपत्यकाको नेवा समुदायले आज यमरी पुन्ही र ज्यापू दिवस धुमधाम साथ मनाउदै छन् । घरघरमा खेतबाट ल्याएको धान सुकाएर झकारीमा राखेपछि योमरी बनाएर विभिन्न देवदेवीलाई पूजा गरेर यो पर्व मनाइन्छ ।
यःमरीलाई कुवेर र गणेशका प्रतिकको रुपमा लिइन्छ । चामलको पिठो मुछेर रोटीको माथिल्लो भाग गजुर जस्तै चुच्चो बनाई भित्र बिशेष प्रकारले बनाएको चाकु, मास, अदुवा,तील, मुगी राखी त्रिकोण आकार गरि दुई किसीम बाट बनाई पानीको बाफमा पकाउने गरिन्छ ।
पूर्णिमाका दिन यःमरीलाई धानका भकारीलगायतमा चढाइने गरिन्छ । यःमरीलाई धानको भकारीलगायत अन्नका भण्डारमा चढाउँदा धनसम्पत्ति र अन्न लाभ हुने जनविश्वास रही आएको छ । यसरी चढाएको यःमरी चारदिनपछि मात्र प्रसादको रुपमा बाँडेर खाने प्रचलन छ ।
उपत्यकाको तीन जिल्लामा रहेका भिमसेन( असल देवता)का मन्दिरका साथै दोलखाको भिमसेन मन्दिरमा आज मुख्य पुजा गरिन्छ ।
उपत्यकाका सबै क्षेत्रमा योमरी पुन्ही माने पनि काठमाडौं दक्षिण–पश्चिम क्षेत्र कीर्तिपुर लगायतमा सात गाँउले जात्रा पर्ने भएकाले मनाउने परम्परा छैन । आजै सात गाँउले जात्राको पनि समापन हुदैछ ।
यसैबीच ज्यापू महागुठी र ज्यापू संरक्षण विकास कोषले योमरी पुन्हीको उपलक्ष्यमा ज्यापू दिवस धुमधामका साथ मनाउदै छ ।
ज्यापु समुदायहरुले आजै राजधानीमा यालीको आयोजना गर्दैछन् । र्याली नगरको विभिन्न ठाउँको परिक्रमा पछि वसन्तपुर पुगी सभामा परिणत हुनेछ ।
