काठमाडौं,२६ मंसिर ।
सरकारले निजामती कर्मचारीको अवकाश अवधि दुई वर्ष बढाउने तयारी स्वरुप ६० वर्ष बनाउने गरी ऐन संशोधन मस्यौदा कानुन मन्त्रालयमा पठाएको छ ।
सामान्य प्रशासन मन्त्रालयका सचिव पूर्णचन्द्र भट्टराईको विशेष पहलमा मन्त्रालयले विद्यमान ५८ वर्षको उमेर हदलाई बढाएर ६० वर्ष बनाउने गरी मस्यौदा तयार गरिएको हो ।
बिधेयक पारित भए लोकसेवा आयोगले यसै वर्षको असारसम्मका लागि विज्ञापन गरेर अघि बढाएको छनोट प्रक्रिया पनि प्रभावित हुनेछ ।
कर्मचारी व्यवस्थापनको जिम्मा पाएको सामान्य प्रशासन मन्त्रालयले उमेर हद बढाउने विषयलाई ’ठूलो उपलब्धि’ भनेको छ । तर संशोधनले पार्नसक्ने तत्कालीन र दीर्घकालीन असरका विषयमा मन्त्रालयसँग कुनै तयारी छैन ।
निजामती कर्मचारीको अवकाश उमेर पहिला ६३ वर्ष थियो, त्यसलाई ६० हुँदै अहिले ५८ वर्षमा झारिएको छ । २०१२ सालमा ६३ वर्ष कायम भएको निजामतीको उमेर हद पञ्चायतकालमा ६० वर्षमा झारिएको थियो । २०४९ सालमा निजामती सेवा ऐन आएपछि त्यसलाई ५८ वर्षमा झारिएको हो ।
विज्ञहरूले निजामती कर्मचारीको अवकाश अवधि दुई वर्ष बढाउँदा केही सकारात्मक र धेरै नकारात्मक असर गर्ने बताएका छन् । पूर्वसचिव एवं लोकसेवा आयोग सदस्य श्रीकान्त रेग्मीले उमेर हद बढाउँदा पेन्सनको दायित्व राज्यलाई घट्ने भए पनि ’जब मार्केट’ दुई वर्ष बन्द भएर दक्ष जनशक्ति विदेश पलायन हुने बताउनु भयो ।
