काठमाडौ २६ मंसिर ।
राष्ट्रपति विद्यादेवी भण्डारीले संविधान संशोधन प्रस्ताव दर्तासंगै दलहरुबीच धुव्रिकरण बढेकोप्रति चिन्ता व्यक्त गर्नुभएको छ । वर्तमान राजनीतिक गतिरोध अन्त्य गरी संविधान कार्यान्वयनमा दलहरु मिलेर जानुको बिकल्प नभएको उहाँले बताउनु भयो ।
राष्ट्रपति भवन सितलनिवासमा प्रधानमन्त्री पुष्पकमल दाहालसँग आज बिहान भेटमा राष्ट्रपति भण्डारीले पछिल्लो राजनीतिक घटनाक्रमप्रति चासो राख्दै संविधान संशोधनको बिषयमा दलहरुबीच देखिएको धुव्रिकरणले संविधान कार्यान्वयनमा चुनौती थप्न सक्ने तर्फ सचेत गराउनु भयो ।
भेटमा प्रधानमन्त्री दाहालले संविधान कार्यान्वयनकै लागि संसदमा संविधान संशोधन प्रस्ताव दर्ता गराएको भन्दै एमालेको असहयोगका कारण गतिरोध बल्झिएको गुनासो गर्नुभएको थियो ।
उहाँले समस्या समाधानका लागी प्रमुख दलहरुबीच थप छलफल गरि निकास निकाल्न पहल गर्ने बताउनुभएको राष्ट्रपति कार्यालय स्रोतले जनाएको छ ।
भेटमा पछिल्लो राजनीतिक घटनाक्रम र सहमतिका लागी सरकारका तर्फबाट भइरहेको प्रयासका बारेमा उहाँहरुबीच कुराकानी भएको प्रधानमन्त्रीका स्वकीय सचिव रमेश मल्लले जानकारी दिनुभयो ।
