काठमाडौ २५ मंसिर ।
छ दिनदेखिको शीतलहर र त्यसबाट बढ्दै गएको चिसोका कारण बालबालिका बिरामी हुन थालेपछि पर्साका सबै विद्यालय आजदेखि बन्द भएका छन् ।
हिउँद लागेसँगै बढेको चिसोका कारण जनजीवन प्रभावित भएपछि एक साताका लागि सबै विद्यालय बन्द गर्ने निर्णय गरेको पर्साका प्रमुख जिल्ला अधिकारी केशवराज घिमिरेले जानकारी दिनुभयो ।
चिसोका कारण जनजीवन कष्टकर बनेपछि आगो ताप्न काठको प्रबन्ध मिलाउन उपमहानगरपालिका, नगरपालिका लगायतका सम्बन्धित कार्यालयलाई निर्देशन गरिएको घिमिरेले बताउनु भयो ।
यस्तै बढ्दो चिसोका कारण कोल्ड डाइरिया, ज्वरो, रुघाखोकी र स्वासप्रस्वासका बिरामीको सङ्ख्या बढेको छ । शीतलहरबाट प्रभावित भई बिरामी हुने जिल्लावासीको औषधि उपचारका लागि जिल्ला जनस्वास्थ्य कार्यालयलाई निर्देशन दिएको छ ।
वीरगन्जको नारायणी उपक्षेत्रीय अस्पतालमा खासगरी जिल्लाको ग्रामीण भेगबाट बालबालिका तथा वृद्धवृद्धा बढी बिरामी भई अस्पताल भर्ना भएको चिकित्सकले जनाएका छन् ।
