सुनसरी, मंसिर २२ ।
सुनसरीको दुहवीभलुवा नगरपालिका– ४ मा रहेको कालोडल्लप उत्पादन उद्योगमा आगलागी हुँदा २० करोड रुपैयाँ बराबरको धनमाल जलेर नष्ठ भएको छ ।
खाना पकाउने एलपी ग्यास चुहावटबाट मंगलबार साँझ लागेको आगोका कारण मनिष अग्रवालको उद्योग जलेर नष्ठ भएको हो । आगो सल्कनासाथ उद्योगमा भएका ग्यास सिलिन्डर पड्किन थालेपछि उद्योगभित्र आगो फैलिएको थियो । आगो फैलिएपछि त्यहाँ कार्यरत मजदुरमा भागदौड मच्चिँदा तीन कामदार घाइते भएका थिए । उद्योगमा करिव दुई हजार मजदुर कार्यरत थिए ।
घाइते मजदुर अमृत श्रेष्ठ दिलीप चौधरी र राजु यादवलाई राति नै उपचारका लागि विपी कोइराला स्वास्थ्य विज्ञान प्रतिष्ठानमा भर्ना गरिएको स्थानीय इलाका प्रहरी कार्यालयका प्रहरी निरीक्षक शिव पोख्रेलले जानकारी दिनुभयो ।
आगलागीका कारण उद्योगकोे कच्चा पदार्थ उपकरणसमेत जलेर पूरै नोक्सानी भएको सञ्चालक अग्रवालको भनाई छ ।
इटहरी, धरान, विराटनगर, दमक र राजविराजबाट आएका बारुणयन्त्रले राति २ बजे मात्र आगो नियन्त्रण मा लिन सफल भएको प्रहरीले जनाएको छ ।
