मंसीर १८ काठमाण्डौं । सरकार र अनसनरत डा. गोविन्द केसीबीच आज सहमति भएको छ । सो सहमति अनुसार अब डा. केसीले झण्डै तीन हप्ता लामो अनसन भोली तोड्ने हुनु भएको छ । सरकारी वार्ता टोली र केसीका प्रतिनिधिहरुले तयार पारेको मस्यौद्धामा केसी सहमत हुनु भएको छ ।
चिकित्सा शिक्षा र सेवामा सुधारको माग राख्दै २१ दिन यता अनसनरत डाक्टर केसीको माग बमोजिम त्रिभुवन विश्वविद्यालय चिकित्साशास्त्र अध्ययन संस्थान आइओएममा आजै प्राध्यापक डाक्टर जगदीश प्रसाद अग्रवाल नियुक्त हुनु भएको छ ।
प्रधानमन्त्री निवास बालुवाटारमा आज विहान बसेको त्रिवि कार्यकारी परिषदको बैठकले आईओएमका डीनमा अग्रवाललाई नियुक्त गरेको हो । त्रिवि उपकुलपति कार्यालयद्वारा गत कात्तिक २८ गते आइओएमको डीनमा नियुक्त प्राध्यापक डाक्टर केशवप्रसाद सिंहले अनसनकै कारण हिजो राजीनामा दिएपछि परिषदले अग्रवाललाई नियुक्त गरेको हो ।
आफूले १० औं पटकको अनसनका क्रममा उठाएका मध्येको प्रमुख विषय बरिष्ठताका आधारमा डीन नियुक्तीको माग पुरा भएसँगै डा. केसी लचिलो बन्नु भएको हो ।
उहाँको अर्को महत्वपूर्ण माग त्रिवि उपकुलपति तीर्थ खनियाँको बर्खास्तीका बिषयमा सरकारले उच्चस्तरीय स्वतन्त्र कमिटि गठन गरी प्रक्रिया थाल्ने आश्वासन दिएको नेशनल रेजिडेन्ट डक्टर्स एशोसिएशनका सचिव सचित शर्माले जानकारी दिनु भयो । डा. केसीको जीवन रक्षाका लागि भन्दै समर्थकहरुले निरन्तर आन्दोलन गर्दै आएका थिए ।
