काठमाडौं , मंसिर १८ ।
आज उपत्यकाका बिभिन्न नदी सफाइका क्रममा १५ मेट्रिक टन फोहर निकालिएको छ । वाग्मती सफाइको १८६औँ हप्तामा आज त्रिपुरेश्वर पुलमुनि सफाइ गरी सात मेट्रिक टन फोहर निकालिएको थियो ।
स्वतःस्फूर्त रुपमा सफाइमा उपस्थित भएकाहरुले दुई समूहमा विभाजन भएर सफाई गरेको अधिकार सम्पन्न वाग्मती सभ्यता एकीकृत विकास समिति सञ्चालक समिति सदस्य नारायण श्रेष्ठले जानकारी दिनुभयो ।
सफाइमा मुख्यसचिव सोमलाल सुवेदी, सङ्घीय मामिला तथा स्थानीय विकास मन्त्रालयका सचिव केदारबहादुर अधिकारी, पूर्वसचिव किशोर थापा लगायतले नेतृत्व गर्नुभएको थियो ।
रुद्रमती सफाइको १४५औँ हप्तामा शनिबार गौशालाचोकदेखि कमलपोखरी चोकसम्म पानीको फोहराले धुलो सफा गरिएको रुद्रमती सरोकार समाजका उपाध्यक्ष रोहित गिरीले जानकारी दिनुभयो । सो अवसरमा सडकको किनारामा फालिएको एक मेट्रिक टन फोहर व्यवस्थापन गरियो ।
विष्णुमती सफाईको ११९औँ हप्तामा आज परोपकार पुलमुनि सफाइ गरी छ मेट्रिक टन फोहर व्यवस्थापन गरिएको थियो । त्यस्तै नख्खुखोला सफाइको ६६औँ हप्तामा आज नख्खु जेलसँगैको पुलमुनि सफाइ गरी एक मेट्रिक टन फोहर निकालिएको छ ।
गुह्येश्वरीमाथिको वाग्मतीमा राम्रो जोरपाटी हाम्रो जोरपाटी, पुडासैनी मैत्री समाज, तिलगङ्गा महिला समूह र माकालबारी टोल सुधार समितिलगायतले सफाइ गरेका थिए ।
