काठमाडौ १८ मंसिर ।
सत्तारुढ दल नेकपा माओबादी केन्द्रले सरकारले संसदमा दर्ता गराएको संविधान संशोधन विधेयकमा दलीय सहमती खोज्न पहल गर्ने निर्णय गरेको छ ।
प्रधानमन्त्री समेत रहनु भएका पार्टी अध्यक्ष पुष्पकमल दाहालको लाजिम्पाटस्थित निवासमा आज बिहान बसेको हेडक्वाटर बैठकले संशोधनका लागि अधिकतम् सहमति जुटाउन दलहरुसँगको छलफललाई तिव्रता दिने निर्णय गरेको हो ।
बैठकले नेपाली कांग्रेस, मधेसी मोर्चा र सत्ता गठबन्धनका अन्य दलसँग थप छलफल गरी संविधान संशोधनमा सहमति जुटाएर पारित गर्ने निर्णय गरेको प्रवक्ता पम्फा भुसालले जानकारी दिनुभयो । बैठकले संविधान संशोधन प्रस्ताव पारित गर्दै निर्वाचनमा जुट्ने निर्णय गरेको छ ।
आजको बैठकमा प्रधानमन्त्री दाहालले संविधान संशोधनका विषयमा अहिलेसम्म अन्य दलसँग भएको छलफलका बारेमा जानकारी गराउनु भएको थियो ।
बैठकले पार्टीको आगामी कार्ययोजना, रिक्त पोलिट्ब्युरो र सचिवालयलाई छिटै पूर्णता दिने निर्णय पनि गरेको छ ।
यसैबीच आजै मोओवादी केन्द्रको पोलिटबयुरो बैठक पनि बस्दैछ । राजधानीको पेरिसडाँडास्थित पार्टी केन्द्रिय कार्यलयमा दिउसो बस्ने बैठकमा संगठन सुदृढीकरण तथा चुनावी रणनितिबारे छलफल हुने जनाएको छ ।
