काठमाडौ ११ मंसिर ।
छैटौं संस्करणको एसिया कप महिला क्रिकेट प्रतियोगिता अन्तरगत आफ्नो पहिलो खेलमा नेपालले आज बलियो टोली पाकिस्तानको सामना गर्दैछ ।
खेल स्थानीय समयअनुसार दिउँसो १ बजेपपछि थाइल्याण्डको बैंककस्थित टर्ड थाई क्रिकेट स्टेडियममा हुनेछ । नेपाली महिला टोलीले एसियाली स्तरमा पाकिस्तानसँग पहिलो पटक प्रतिस्पर्धा गर्न लागेको हो ।
पाकिस्तानले सन् २००८ मा भएको प्रतियोगिताको दोस्रो संस्करणदेखि सहभागिता जनाउदै आएको छ भने नेपाल सन् २०१२ मा ग्वान्झाउमा भएको पाँचौ संस्करणपछि मात्र सहभागी भएको हो ।
गत असोजमा हङकङमा भएको आइसीसी महिला विश्वकप अन्तर्गत एसिया छनोटमा दोस्रो भएपछि नेपालले एसिया कप खेल्न पाएको हो ।
प्रतियोगितामा नेपाल र थाइल्याण्डसहित टी ट्वान्टी टोलीको मान्यता प्राप्त पाकिस्तान, भारत, श्रीलंका र बंगलादेश पनि सहभागी छन् ।
आगामी मंसिर १९ गतेसम्म चल्ने प्रतियोगितामा सहभागी ६ टोलीले राउन्ड रोविन लिगका आधारमा खेल्नेछन् । शीर्ष दुई टोलीले उपाधिका लागि प्रतिस्पर्धा गर्नेछ ।
