काठमाण्डौ मंसिर ४ । नेपाली राष्ट्रिय फुटबल टिमले जापानको फ्रेण्डस् अफ जापान टिमसँगको च्यारिटी खेल १–० गोल अन्तरले जितेको छ ।
नेपाल र जापानबिच कुटनीतिक सम्बन्ध स्थापना भएको ६० वर्ष पुगेको अवसरमा अखिल नेपाल फुटबल संघ एन्फा र जापानको गैरसरकारी संस्था कलरबाथको संयुक्त आयोजनामा एन्फा कम्प्लेक्स सातदोबाटोमा भएको खेलमा नेपालका लागि नवयुग श्रेष्ठले एक मात्र निर्णायक गोल गरे ।
खेलको ५७ औँ मिनेटमा बिमल घर्तीले गरेको प्रहार जापानी गोल रक्षकले फर्काएको रिबाउन्डेड बललाई नवयुगले जाली चुमाएका थिए । खेलमा नेपालका बिक्रम लामा म्यान अफ द म्याच भए ।
केही दिनअघि मलेसियामा एएफसी सोलिडारिटी कपको उपाधि जितेर आएको नेपाली टिमले जे लिग तथा विश्वभर व्यावसायिक फुटबल खेल्ने जापानी खेलाडीलाई निराश पारेका थिए ।
जापानी टिममा रहेका टोडा काजुयुकी सन् २००२ को विश्वकपमा जापानका तर्फबाट तथा इंग्लिस क्लब टोटेनह्यामबाट व्यावसायिक फुटबल खेलेका हुन् ।
