काठमाण्डौ ,२८ कार्तिक ।
निर्वाचन आयोगका प्रमुख आयुक्त अयोधी प्रसाद यादवले निर्वाचनको मिति घोषणादेखि कर्मचारी खटाउनेसम्मको अधिकार आयोगलाई दिन माग गर्नुभएको छ ।
संसदको राज्य व्यवस्था समितिको आजको बैठकमा प्रमुख आयुक्त यादवले अघिल्ला निर्वाचनमा देखिएका कमजोरी सुधार्न निर्वाचनको मिति घोषणादेखिको सबै अधिका दिन माग गर्नुभएको हो ।
निर्वाचनलाई तथ्यपरक, वस्तुनिष्ठ र निष्पक्ष बनाउन सबै राजनीतिक दलले आयोगको भूमिकालाई सहयोग गर्नुपर्ने यादवको जोड छ ।
आजको बैठकमा उपप्रधान तथा गृहमन्त्री विमलेन्द्र निधीले सरकारले धेरै छलफल गरेर प्रस्तुत गरेको निर्वाचनसँग सम्वन्धीत विधेयक औचित्यपुर्ण रहेकाले छिटो पारित गरेर निर्वाचनमा जानुपर्ने बताउनु भयो । उहाले संविधानमा व्यवस्था भएअनुसार तोकिएको समयमा तीनै तहको निर्वाचन हुने दाबी पनि गर्नुभयो ।
समिति सदस्यले पनि संविधान कार्यान्वयनका लागि स्थानीय तह, प्रदेश र संसद्को निर्वाचन २०७४ माघभित्र गरिसक्नुपर्ने भएकाले निर्वाचन, दल र मतदाता सम्बन्धी विधेयक छिटो पारित गर्न आग्रह गरेका थिए ।
समितिमा निर्वाचन आयोग, राजनीतिक दल र मतदाता नामावलीसम्बन्धी विधेयकमाथि आजदेखि छलफल सुरु भएको छ । संसदको बहुमतले यी तिनैवटा विधेयक छलफलका लागि समितिमा पठाएको हो ।
