कार्तिक २६ सुनसरी । सुनसरीको धरान उपमहानगरपालिका–२० को छोटी मोरङमा निर्माण गरिने विशाल हजार बुद्ध (थाउजेण्ड बिग बुद्ध) विहारको शिलान्यास गरिएको छ । पर्यटकीय क्षेत्र भेडेटारदेखि केही तल्लो भागमा रहेको छोटी मोरङको १० बिघा क्षेत्रफलमा दुईतले बौद्ध विहारको माथिल्लो भागमा १७५ मिटर अग्लो अर्धकद भएको बुद्ध मूर्तिसगै तल्लो तलामा एक हजार बुद्धको अर्धकदका मूर्ति रहनेछ । सुनसरी उद्योग वाणिज्य सङ्घ समेतका सक्रियतामा यस विहार निर्माण हुन लागेको हो ।
धरानबाट सहजै नाङ्गो आँखाले समेत देखिने गरी उच्च दृश्यावलोकन गर्न सकिने ढङ्गले डिजाइनिङ गरी सूर्योदय बौद्ध विहारले परिकल्पना गरेको थाउजेण्ड बिग बुद्ध विहार अहिले सम्मकै सबैभन्दा ठूलो र आकर्षक ढङ्गको हुने बताइएको छ । करिब एक अर्बको लगानी रहने थाउजेन बिग बुद्ध विहार बौद्ध धर्मावलम्बीको पुजनीय र पर्यटकीय आकर्षणको केन्द्रका रुपमा हुने बताइएको छ । उक्त स्थानमा बौद्ध धार्मिक पूजास्थल केन्द्र आकर्षक पार्क लगायतका भौतिक पूर्वाधार सगै चिकित्सकीय भवन समेत रहने धरान नगरपालिकाका इन्जिनियर सुरज श्रेष्ठले जानकारी दिनुभएको छ ।
थाइल्यान्ड, हङकङ अस्ट्रेलिया, बेलायत लगायतका देशमा बसोबास गर्ने बौद्धिस्टको सहयोगमा निर्माण हुने थाउजेन बिग बुद्धको निर्माणले भगवान् गौतम बुद्धको जन्मस्थल लुम्बिनी मात्र नभएर अब धरानको बूढी मोरङ पनि बुद्ध धर्मावलम्बीको गन्तव्यस्थलका रुपमा विकास हुने बताइएको छ । विश्वमा नेपाल एक हिन्दू राज्य, भगवान् गौतम बुद्धको जन्मभूमि अनि विश्वको अग्लो चुचुरो सगरमाथा भएको देशका नामले प्रख्यात रहेकोले धरान उपमहानगरपालिका सूर्योदय बौद्ध बिहार र यस थाउजेण्ड बिग बुद्ध विहारले नेपालको शिर उच्च बनाउन थप मद्दत पुग्ने विश्वास सर्बसाधारणले गरेको छ ।
