काठमाडौं, कात्तिक २०
मलेसियामा जारी एएफसी सोलिडारिटी कपमा नेपालले आज आफ्नो पहिलो खेलमा टिमोर लिस्टेको सामना गर्दै छ । यी दुइ टोली विचको खेल नेपाली समय अनुसार साँझ सवा ५ बजे मलेसियाको कुचिङ स्थित निगेरी रंगशालमा हुनेछ ।
टिमोर लिस्टेको यो समूहको दोस्रो खेल हो । गत बुधबार भएको पहिलो खेलमा टिमोर लिस्टे बु्रनाइसँग ४–० ले पराजित भएको थियो ।
नेपाली टिमका मुख्य प्रशिक्षक ग्योटुकु कोजीले टिमोर लिस्टेले पहिलो खेल गुमाएको भएपनि आफूहरुले उसलाई कमजोर रुपमा नलिएको बताएका छन् । तर नेपाली टोली टिमोर लिस्टेसँगको खेलका लागि पूर्ण रुपमा तयार रहेको प्रशिक्षक कोजीको भनाई छ ।
नेपालले पछिल्लो पटक सन् २०११ मा टिमोरलाई हराएको थियो । टिमोर टिम सन् २०११ भन्दा पूर्ण रुपमा परिवर्तन भइ उनीहरु कमजोर नभएको भन्दै नेपाली टोलीका कप्तान अनिल गुरुङले आफूहरु पनि खेलका लागि पूर्ण तयार रहेको बताएका छन् ।
सात देशको सहभागिता रहेको प्रतियोगितामा नेपाल, टिमोर लिस्टे र ब्रुनाइ समूह एमा छन् । यस्तै समूह बीमा श्रीलंका, मकाउ, मंगोलिया र लाओस रहेका छन् ।
