एजेन्सी , कात्तिक १६ । स्वान्सी सिटीलाई ३–१ ले पराजित गर्दै स्टोक सिटीले इंग्लिस प्रिमियर लिगमा लगातार तेस्रो जित दर्ता गरेको छ ।
स्टोकको जितमा स्वान्सीका पूर्व खेलाडी विलफ्रेड बोनीले दुई गोल गरेका थिए । स्वान्सीका अलफी ओवसनले आत्मघाती गोल गर्दै स्टोकलाई उपहार दिए ।
स्वान्सीका लागि वेन रुटलेजले एक गोल गरेका थिए । तेस्रो मिनेटमा नै बोनीले गोल गर्दै स्टोकलाई सुरुवाति अग्रता दिलाए ।
तर ८ औं मिनेटमा रुटलेजले स्वान्सीका लागि बराबरी गोल फर्काए ।
५५ औं मिनेटमा ओवसनले आत्मघाती गोल उपहार दिएपछि स्टोकले २–१ को अग्रता लियो । ७३ औं मिनेटमा बोनीले व्यक्तिगत दोस्रो गोल गर्दै स्टोकलाई ३–१ को जित दिलाए ।
जितपछि १० खेलबाट १२ अंक जोडेको स्टोक १२ औं स्थानमा उक्लिएको छ । समान १० खेलबाट पाँच अंकमात्रै जोडेको स्वान्सी पुछारबाट दोस्रो स्थानमा छ । स्वान्सीले लिगमा अहिलेसम्म एक खेलपनि जितेको छैन ।
