काठमाडौं,१४,कार्तिक । सीतापाइलास्थित नागार्जुन कम्युनिकेसन, स्टेसनरी एण्ड सप्लायर प्रालिले आइतबार १०८ औं लक्ष्मीजयन्ती समारोह आयोजना गरेको छ ।कार्यक्रममा पूर्व शिक्षामन्त्री राधाकृष्ण मैनालीले नेपाली साहित्यको विकासका लागि संस्थागत प्रयासको खाँचो रहेको बताएका छन् । प्रमुख अतिथिको आसनबाट बोल्दै मैनालीले नेपाली साहित्यको विकासमा सामूहिक रुपले संलग्न हुनसके महाकवि देवकोटाप्रति सच्चा श्रद्धाञ्जली हुने बताए ।
समारोहमा स्थानीय शिशुनिकुञ्ज उच्च माविका प्राचार्य प्रकाशमान शाहीले नेपाली भाषा र साहित्यको विकासमा देवकोटाको महत्वपूर्ण योगदान रहेको बताए । साहित्यकार डा.शिवराज पाण्डेले महाकवि देवकोटाका कालजयी रचनामा स्वच्छन्दतावाद र प्रकृतिको मानवीकरण पाइने उल्लेख गरे ।
लेखक तथा साहित्यकार धीरकुमार श्रेष्ठले देवकोटा नेपाली साहित्यका शिखर पुरुष भएको बताउँदै उनका कृतिको पठनपाठन र प्रचार प्रसारमा जोड दिनुपर्ने आवश्यकता औँल्याए । कार्यक्रममा कवि बैरागी जेठा, रामगोपाल आसुतोष, महेश क्षितिज, रामदेव पाण्डे, कुमार अनल लगायतले आ—आफ्ना रचना वाचन गरेका थिए ।
समारोहमा महाकवि देवकोटाका कृति वाचन गरिनुका साथै उनको प्रतिमामा माल्यार्पण गरिएको थियो । नागार्जुन कम्युनिकेसनका सल्लाहकार कवि, समालोचक तथा उपप्राध्यापक महेश पौड्यालको सभापतित्वमा सम्पन्न कार्यक्रमको सञ्चालन माधव अधिकारीले गरेका थिए ।
