काठमाडौं, कात्तिक १४ ।
आगामी बुधारबदेखि सुरु हुने एएफसी सोलिडारिटी कप खेल्न जान लागेको नेपाली राष्ट्रिय फुटबल टोलीको आज अखिल नेपाल फुटबल संघ (एन्फा)ले बिदाई गरेको छ ।
आज राजधानीमा एक कार्यक्रमको आयोजना गरी (एन्फा)ले प्रतियोगिता खेल्न जाने टोलीको बिदाइ गरेको छ ।
एसियाली फुटबल महासंघ एएफसीको आयोजनामा हुने प्रतियोगितामा नेपालसहित अरु ७ एसियाली राष्ट्रहरुले प्रतिस्पर्धा गर्दैछन् ।
समूह ‘ए’मा नेपाल, ब्रुनाइ र टिमोर लिस्टे रहेका छन् । यही समूहमा रहेका बंगलादेश र पाकिस्तानले प्राविधिक कारण देखाउँदै प्रतियोगिताबाट नाम फिर्ता लिएपछि समूह ‘ए’मा तीन टोलीमात्र बाँकी रहेका हुन् ।
यस्तै, समूह ‘बी’मा श्रीलंका, मकाउ, मंगोलिया र लाओस रहेका छन् ।
नेपालले आफ्नो पहिलो खेलमा आगामी शुक्रबार टिमोर लिस्टेको सामना गर्नेछ भने कात्तिक २३ गते ब्रुनाइसँग खेल्नेछ ।
एन्फाले यसअघि नै प्रतियोगिताका लागि अनिल गुरुङको कप्तानीमा राष्ट्रिय टोलीको घोषणा गरिसकेको छ ।
