जनकपुर, कात्तिक १३।
उपप्रधान एवं गृहमन्त्री विमलेन्द्र निधिले भारतीय राष्ट्रपतिको भ्रमण तालिका सार्वजनिक भएलगत्तै जनकपुर भ्रमणको तयारीबारे जानकारी लिनुभएको छ ।
गृहमन्त्री निधिले आज जनकपुर पुगेर जानकी मन्दिरका महन्त रामतपेश्वरलाल दास र सहायक महन्त रामरोशन दास तथा प्रमुख जिल्ला अधिकारी दिलीपकुमार चापागाँईले दर्शन र नागरिक अभिनन्दनको तयारीको व्यवस्था र सुरक्षाबारे जानकारी लिनुभएके हो ।
निधीले राष्ट्रपति मुखर्जीकोसमेत जनकपुर भ्रमणको अवसर जनकपुरवासीले पाउनु सौभाग्य भएकाले जनकपुरको वातावरण सुन्दर र शान्त राख्न आग्रह पनि गर्नुभयो । सो क्रममा स्थानीय विकासमन्त्री हितराज पाण्डे र सुरक्षा निकायका उच्च पदाधिकारी, भारतीय वाणिज्यदूत अञ्जु रञ्जन, परराष्ट्र मन्त्रालयका पदाधिकारीको उपस्थिति रहेको थियो ।
भ्रमण तयारीबारे जानकारी लिएलगत्तै पत्रकारसँग कुराकानी गर्दे गृहमन्त्री निधिले नेपाल र भारतबीच सांस्कृतिक, धार्मिक, भोगौलिक सम्बन्ध जनस्तरमा भएकाले भारतीय राष्ट्रपतिको भ्रमणले हरेक क्षेत्रमा राम्रो प्रभाव पार्ने बताउनुभयो ।
भारतीय राष्ट्रपतिको भ्रमणले दुबै देशबीचको सुमधुर सम्बन्ध अझ विस्तार हुने उहाले विश्वास व्यक्त गर्नुभयो ।
भारतीय राष्ट्रपति मुखर्जीको यही १९ गते जनकपुरमा जानकी मन्दिरमा पूजाअर्चना र तिरहुतिया गाछीमा जनकपुर उपमहानगरपालिकाद्वारा नागरिक अभिनन्दन गर्ने कार्यक्रम रहेको छ ।
