काठमाडौ ८ कार्तिक । अखिल नेपाल फुटवल संघ एन्फामा रिक्त रहेको अध्यक्ष पदमा नरेन्द्र श्रेष्ठ निर्वाचीत भएका छन् ।
आज भएको १५ औं एन्फाको साधारण सभाले एकवर्षका लागि अध्यक्षमा श्रेष्ठलाई निर्वाचीत गरेको हो । प्रतिद्धन्दी कर्मा छिरिङ शेर्पालाई ५ मतले हराउदै श्रेष्ठ निर्वाचीत भएका हुन् । उनले ३६ मत प्राप्त गरेका थिए भने शेर्पाले ३१ मत ल्याए ।
यसै गरी उपाध्यक्षमा पनि श्रेष्ठ प्यानलबाटै मणि कुवर निर्वाचीत भएका छन् । कुवरले ३४ र उनका प्रतिद्धन्दी दिपक खातीले २५ मत प्राप्त गरेका थिए । तत्कालिन अध्यक्ष गणेश थापालाई फिफाले भ्रष्टाचारी ठहर गर्दै १० वर्षका लागि प्रतिवन्ध लगाएको र उपाध्यक्ष ललितकृष्ण श्रेष्ठको निधन भएका कारण यी दुई पदमा एकवर्षे कार्यकालका लागि निर्वाचन भएको हो ।
यस अघि कार्की वानक्वेट बबरमहलमा साधारण सभाको उद्घाटन खेलकुद मन्त्री दलजीत श्रीपाईलीले गर्नु भएको थियो ।
झापा बाहेकका ४४ जिल्ला फुटबल संघ, १२ वटा ए डिभिजन क्लबबाट एकएक जना, बी डिभिजनका क्लवबाट ४ जना, सी डिभिजनबाट तीनजना, महिला फुटबल संघ, रेफ्रि संघ, प्रशिक्षक संघ र खेलाडी संघबाट एक एक जना गरी ६७ जना प्रतिनिधिले मतदान गरेका थिए ।
