काठमाडौ ८ कार्तिक । अखिल नेपाल फुटवल संघ एन्फामा रिक्त रहेको अध्यक्ष र उपाध्यक्ष पदका लागि आज निर्वाचन शुरु भएको छ । निर्वाचन बेलुकी ५ बजे सकिने छ । एन्फाको साधारण सभाले एकवर्षका लागि अध्यक्ष र उपाध्यक्ष चयन गर्ने छ ।
यस अघि कार्की वानक्वेट बबरमहलमा साधारण सभाको उद्घाटन खेलकुद मन्त्री दलजीत श्रीपाईलीले गर्नु भएको थियो ।
तत्कालिन अध्यक्ष गणेश थापालाई फिफाले भ्रष्टाचारी ठहर गर्दै १० वर्षका लागि प्रतिवन्ध लगाएको र उपाध्यक्ष ललितकृष्ण श्रेष्ठको निधन भएका कारण यी दुई पदमा एकवर्षे कार्यकालका लागि निर्वाचन हुन लागेको हो ।
अध्यक्षका लागि एन्फाका कार्यवहाक अध्यक्ष नरेन्द्र श्रेष्ठ र उपाध्यक्ष कर्माछिरिङ शेर्पा प्रतिस्पर्धामा हुनुहुन्छ । उपाध्यक्षमा श्रेष्ठ पक्षबाट मणी कुँवर र शेर्पा पक्षबाट दीपक खातीले उम्मेदवारी दिनुभएको छ ।
यस्तै राष्ट्रिय फुटबल टिमका पूर्व कप्तान समेत रहेका उपेन्द्रमान सिंहले पनि स्वतन्त्र रुपमा उपाध्यक्षमा उम्मेदवार दिनु भएको छ । निर्वाचनमा ६७ जना मतदाता सहभागी हुनेछन् ।
झापा बाहेकका ४४ जिल्ला फुटबल संघ, १२ वटा ए डिभिजन क्लबबाट एकएक जना, बी डिभिजनका क्लवबाट ४ जना, सी डिभिजनबाट तीनजना, महिला फुटबल संघ, रेफ्रि संघ, प्रशिक्षक संघ र खेलाडी संघबाट एक एक जना गरी ६७ जना प्रतिनिधिले मतदान गर्न पाउनेछन् ।
