काठमाडौ ८ कार्तिक । नेपाली कांग्रेसको केन्द्रिय कार्यसमिति बैठक आज बस्दैछ । पार्टी केन्द्रिय कार्यलय सानेपामा केहिबेरपछि बस्ने बैठकले अख्तियार प्रमुख कार्कीविरुद्ध संसदमा दर्ता भएको महाअभियोग प्रस्तावबारे आधिकारिक धारणा तय गर्ने जनाएको छ ।
प्रतिपक्षी दल नेकपा एमाले र सत्ता नेतृतवकर्ता दल नेकपा माओवादी केन्द्रले महाअभियोगलाई समर्थन गर्ने आधिकारिक निर्णय गरिसकेको अवस्थामा कांग्रेसको धारणालाई महत्वका साथ हेरिएको छ ।
यसअघि दुई दिन चलेको बैठकमा २५ जना केन्द्रिय सदस्यले धारणा राखेका थिए । बैठकमा बोल्ने सदस्यहरुले संसदको सबैभन्दा ठूलो दल र सत्तारुढ दललाई थाहै नदिई प्रस्ताव आएको भन्दै असन्तुष्टी जनाएका थिए ।
आजको बैठकमा बोल्न बाँकी रहेका थप सदस्यहरुले धारणा राख्ने क्रम जारी रहने नेताहरुले बताएका छन् । बैैठकमा संविधान संशोधन, स्थानीय निकायको पुनर्संरचना लगायतका विषयमा पनि छलफल हुने बताइएको छ ।
