काठमाडौं, ७ कार्तिक । नेपाली कांग्रेसका सभापति शेरबहादुर देउवाले अख्तियार प्रमुख लोकमानसिंह कार्कीविरुद्धको महाअभियोग प्रस्तावमा जनमतविरुद्ध नजाने स्पष्ट पारेका छन् । महाअभियोग प्रस्ताव तत्काल पारित गराउन दबाव दिन विहान आफ्नै निवास बुढानिलकण्ठ आएका ११ विद्यार्थी संगठनको ज्ञापन–पत्र बुझ्दै सभापति देउवाले पार्टी निर्णय गर्दा जनमतको पनि ख्याल गरिने बताएका हुन् ।
उनले महाअभियोबारे पार्टीको केन्द्रीय समिति बैठकबाट आधिकारिक निर्णय गरिने पनि बताए । कांग्रेस केन्द्रीय समितिको जारी बैठक सोमबार पुनः बस्दैछ । सभापति देउवाले महाअभियोगबारे जनमत बुझ्ने काम पनि भइरहेको बताए ।
यसैबीच, अनेरास्ववियु, नेविसंघ, अखिल (क्रान्तिकारी) सहितका ११ विद्यार्थी संगठनले कार्कीविरुद्धको खबरदारीका लागि दिउँसो दुई बजे माइतीघरदेखि बानेश्वरसम्म दवाब जुलुस प्रदर्शन गर्ने भएका छन् ।
