काठमाडौ ६ कार्तिक ।
नेकपा माओवादी केन्द्रको पार्टी हेडक्वाटर बैठक आज बस्दैछ । अख्तियार प्रमुख लोकमानसिंह कार्कीमाथि दर्ता भएको महाअभियोग प्रस्तावका विषयमा छलफल गर्न प्रधानमन्त्री समेत रहनु भएका पार्टी अध्यक्ष पुष्पकमल दाहालले बैठक बोलाउनु भएको हो ।
बिहान ११ बजेपछि लाजिम्पाटस्थित पार्टी अध्यक्ष दाहालको निवासमा बस्ने बैठकमा अख्तियार प्रमुख कार्कीविरुद्ध महाअभियोग प्रस्ताव पारित गराउन भइरहेको ढिलाई तथा महाअभियोग प्रस्ताव दर्तामा पार्टीले लिएको अग्रसरताबारे समिक्षा हुने जनाइएको छ ।
महाअभियोग प्रकरणमा पार्टी भित्र गम्भिर छलफल नगरी अग्रसरता लिएर केही नेताले त्रुटीपूर्ण काम गरेको भन्दै उनीहरुलाई कारबाही गर्नुपर्ने अवाज समेत पार्टीभित्र उठेको स्रोतले बताएको छ ।
महाअभियोग प्रस्ताव सम्बन्धमा दलहरु अन्योलमा रहेको अवस्थामा बस्न लागेको माओवादी केन्द्रको आजको बैठकले गम्भिर निर्णय गर्नसक्ने नेताहरुले बताएका छन् ।
