काठमाडौ ५ कार्तिक ।
लोकमान प्रकारणपछि बदलिएको राजनितिक परिस्थिति र चौतर्फी विरोधका कारण प्रतिपक्षी दल नेकपा एमालेका अध्यक्ष केपी शर्मा ओलीको आजदेखि हुने भनिएको बंगलादेश भ्रमण स्थगित भएको छ ।
अख्तियार प्रमुख लोकमानसिंह कार्कीमाथि महाअभियोग लगाउने सम्बन्धी संसदमा दर्ता भएको प्रस्तावमा दलहरुबीच छलफल चलिरहदा विदेश भ्रमणमा जान लागेको भन्दै चौतर्फी आलोचना भएपछि उहाँले भ्रमण स्थागित गर्नुभएको हो ।
उहाँ बंगलादेशको सत्तारुढ अवामी लिग पार्टिको कार्यक्रममा सहभागी हुन आज दिउँसो पौने २ बजे ढाका जाने कार्यक्रम रहेको थियो ।
अख्तियार प्रमुख कार्की बिरुद्ध संसदमा दर्ता भएको महाअभियोग प्रस्ताव पारितका लागि दलीय सहमति जुटाउने निर्णय गरेपनि एमाले नेताहरु भने बिदेश भ्रमणमा निस्कन लागेको भन्दै चौतर्फी बिरोध भएको थियो ।
एमाले कार्यालय सचिव कृष्णगोपाल श्रेष्ठका अनुसार, कार्यक्रममा सहभागी हुन सांसद राजन भट्टराईको नेतृत्वमा दुई सदस्यीय टोलीमात्र दिउँसो पौने २ बजे ढाका उड्नेछ ।
यस्तै पार्टीको कामका लागि भन्दै बरिष्ठ नेता झलनाथ खनाल र नेता माधवकुमार नेपालको पूर्व निर्धारित भ्रमण तालिका भने यथावत रहेको एमालेले जनाएको छ ।
नेता खनाल भोली जापान र नेता नेपाल पर्सि भियतनाम जाने कार्यक्रम छ । महासचिव ईश्वर पोख्रेल पनि अष्ट्रेलिया र न्युजिल्याण्डको भ्रमणमा हुनुहुन्छ । उहाँ आगामी कार्तिक १२ गते मात्र काठमाडौं फर्कनु हुनेछ ।
यसअघि सभामुख ओनसरी घर्तीले पनि महाअभियोग प्रस्ताव संसदमा दर्ता भएपछि आजका लागी तय भएको जेनेभा भ्रमण स्थगित गर्नुभएको थियो ।
