काठमाडौ ,५ कार्तिक ।
सत्तारुढ दल नेपाली कांग्रेसको केन्द्रिय समिति बैठक आजपनि बस्दैछ । ललितपूरको सानेपास्थित पार्टी केन्द्रिय कार्यलयमा बिहान ११ बजेपछि बस्ने बैठकमा आजपनि संसदमा दर्ता भएको अख्तियार प्रमुख लोकमानसिंह कार्कीको महाअभियोग प्रस्तावबारे छलफल हुने जनाइएको छ ।
सदनमा कार्कीविरुद्ध महाअभियोग दर्ता भएको एकदिन पछि हिजोदेखि सुरु बैठकमा महाअभियोग प्रस्तावबारे सदस्यहरु धारणा राख्नेक्रम जारी छ । आजको बैठकमा बोल्न बाँकी सदस्यहरुले कार्कीविरुद्धको महाअभियोग प्रस्तावमा पार्टीले अवलम्बन गर्नुपर्ने रणनितिबारे सुझाव दिने जनाएको छ ।
यसअघि हिजोको बैठकमा ९ जना सदस्यले धारणा राखेका थिए । बैठकमा बोल्ने अधिकांश सदस्यहरुले महाअभियोग प्रस्तावलाई समर्थन गर्नुपर्ने सुझाव दिएका छन् । यद्यपी सत्तासाझेदार दल कांग्रेसलाई वेवास्ता गर्दै नेकपा माओवादीले प्रतिपक्षी एमालेसँग मिलेर प्रस्ताव ल्याएको भन्दै केही सदस्यहरुले आपत्ती जनाएका थिए ।
सदस्यहरुले बोल्ने क्रम सकिए सदनमा दर्ता भएको महाअभियोग प्रस्तावबारे आजै आधिकारिक धारणा सार्वजनिक गर्ने काग्रेसको तयारी छ । यस्तै बैठकमा मधेशी मोर्चाको माग सम्बोधनका लागि गर्ने भनिएको संविधान संशोधन प्रक्रियाका विषयमा पनि छलफल हुने बताइएको छ ।
